Novak Đoković, najbolji teniser ikada, osvrnuo se na prognozu Gorana Ivaniševića, njegovog nekadašnjeg trenera, vezanu za ovogodišnji Vimbldon.

Đoković je u osmini finala pobijedio Aleksa de Minora sa 3:1, te se tako plasirao u četvrtfinale gdje će igrati protiv Italijana Flavija Kobolija.

Ivanišević, koji je inače sada trener Stefanosa Cicipasa, rekao je nedavno da je Novak prvi favorit za titulu.

„Novak je jedini koji još može ozbiljno da zaprijeti Alkarazu i Sineru. Ovde na travi ga niko neće zaustaviti prije polufinala. Po meni, on je favorit – koliko god to sentimentalno zvučalo“, rekao je Ivanišević.

Nakon pobjede nad De Minorom, uslijedio je odgovor Đokovića.

„Uh… Volim Gorana i drago mi je što i on voli mene“, rekao je kroz smeh Đoković.

„Ali, iskreno, ne mislim da sam ja favorit protiv Sinera i Alkaraza. Oni su mlađi, u odličnoj su formi i igraju fenomenalno. Ipak, ovdje, na travi, možda imam najbolju šansu protiv njih.“

Đoković protiv Kobolija u četvrtfinalu

Koboli je ove sezone napravio veliki iskorak. Osvojio je titulu u Bukureštu iz serije 250, a onda kasnije i Hamburg iz kategorije 500. Ulazak u četvrtfinale Vimbldona mu je ubjedljivo najbolji rezultat na grend slemu.

Do sada su igrali samo jednom kada ga je Đoković razbio na mastersu u Šangaju sa 6:1, 6:2, a prije meča je otkrio koliko ga je Srbin inspirisao.

„On je moj idol otkako sam počeo da igram tenis. Gledao sam snimke njega i njegovih mečeva, a sada idem da spavam gledajući njegove najbolje udarce. Želim da se zabavim što je više moguće“, poručio je on tada.